Posts tagged life

Engah nge ka rilru a buai thin le,
Khawvel thilte vang a lo ni.

Khawtlang lunglen (Lunglei) tih ka ziah lai hian heti em ema hma hian Lunglei kal theihna chance ka nei ang tih ka ring bik miah lo; mahse ka kal tlat… Ka kal mai pawh a ni lova, kan chhungin kan kal, kan monu nen lam kan kal! Kum 13 hnua kan chhungkuaa kan zin ho leh hmasa ber a ni…. (memories…memories)

Ramthar Venga kan kohhran lawinain Silver Jubilee an lawm dawn a; chuvangin kan chhungin kan kal a, July 19 (saturday) tlai lamah kan thleng a. Zanah kan inkhawm nghal a, inkhawm banah ka hnatlang chhunzawm ve nghal. A tuk sunday nileng kan inkhawm a. Monday chhunah kan hnatlang a, zanah KTP puala lawmna an buatsaihah thingpui ka lum ve leh a. Tuesday chhunah kan hnatlang a, vawk 3-Gate-ah kan va la a, rin aiin ruahsur hnuaiah chuan vawk hi motor a hlan kai mai an lo har zek. Zanah kan inkhawm leh a. Wednesday (21 July) nilenga lawm a ni a, inkhawm a awm a; mahse kei chu inkhawm lovin thingpui ka lum a, tlai lamah ka fatu ve leh bawk. Kum 10 awm tawh loh hnuah pawh la inti tatu ve tak chu ka ni.

Ka tlawh chak em em thin Nghasih leh Khuailui vel ka kal thei lo erawh hreawm ka ti ngawih ngawih a, tuktin kan thlen in atangin ha nawt pahin ka thlir ziah!

Tlangval laiin ka in-dang dawn :)

Ka lehkha zirpui thin Alan-a, Lunglei leh Ruata, Champhai te nen kan in atanga hla lutuk lovah in kan luah dawn a. Kan lehkha zir lai atanga kan lo chak thin - freelancing (web designing) tih kan tum ta a. Ni 15 April velah kan in seng lut ang a, kan theih ang angin kan thawk chho nghal mawp mawp ang. April thla chhung erawh hi chuan portfolio tan hun kan sen nasat ber a rinawm a ni.

Ka hna atangin ka bang ang a, an ni pahnih hi an khua atang ve vein an rawn kal bawk ang. Alan-a leh Ruata hi chuan tunah pawh freelancing-in ei an zawng mek a. Kan huphurh a; mahse kan chak tawh a ni. Theih tawp chhuah turin kan inpeih a; a hlawhtlinna erawh Pathian kut a ni.

Ka lawm ngei mai, hei leh chen Lalpa’n min awmpui hi. Chu mai chu a ni lo, chhung leh khat te, then leh rual te chungah ka lawm tak zet a ni.

misual.com lam pawhin min ‘Happy Birthday’ a, ka lawm khawp mai. Min wish-tu ber X_MAN_19, admin leh user zawng zawngte chungah pawh ka lawm hle mai.

Birthday 2010 challenge erawh ka ti hlawhtling thei ta lo. 1kg chiah ka lost thei :-( Amaherawhchu, zing kar exercise lak erawh ka la chhunzawm ve zel e, nitin ni lem lovin.

Zorock - Ka pian champha

Photo Credit: Rema Chhakchhuak

Tunlai chu ka lung a leng ve deuh tlat, dah mai a na.

Kar hnih liam taah khan Lunglei kan awm laia ka thianpa ber, Nuntluanga a rawn zin phei a, kum 10 zet a liam hnuah kan han titi dun leh a. Kan kohhran (Ramthar Presbyterian) chanchin kimchang ka zawt a, tleirawl chhuah hlima kohhran nuam kan tih thin ziate ka ngaihtuah let a, a lo hlu hle mai. Pathian thu ka awih tanna bul a nih angin ka tan chuan he kohhran hi a hlu tawp thei dawn lo a ni. July 21, 2010 hian Silver Jubilee an lawm ve tawh dawn a, kal ve theih ngei a chakawm khawp mai.

Kan thenrual hluite chanchin ka zawt a, hna an lo thawk vek tawh a, min ti lawm khawp mai; mahse kan thian thenkhatte chanchin erawh a ngaihnawm vak lova, a then phei chu min hrilh that duh lohte pawh a nei a ni awm e.

Kum 1990 atanga April, 2001 chhung Ramthar Veng, Lungleiah kan awm a. Kan khawvel hriat tam tak hi Ramthar Veng a nih phah reng a.

Hmanni misual.com lama Lunglei lui thlalak an rawn post te khan lung a ti leng ve khawp mai. A thlalakah khan a lui kawr kha a lang pawnlang tawh a, kan kal ve thin laite kha chuan a thuk thei fu asin le. Nghasihah te khan sangha man tur a la awm reng ang em le? Khuailui tawntirh te kha a la ngaw ang em le? Kharzawl te kha… Inrinni tin nghasih kal tur kan han tlan thleng zak thinte kha… kan lo va in-fit em!

Ka pa nen khuailui tawntirhah thang thleng kan kam thin a. Sava kan awk ve raih zel a. School/Office banah kan pahnihin kan zuk en thin a, a lunglen thlak ve hle mai.

Tlak lam ramah Lunglawn ngaw a awm a. Ka pa nen vawi eng emaw zat chakai kan khawrh dun thin a, khang hun te kha ka theihnghilh phal loh tur a ni. Ka pa te office a mi, Pu Nghinglova (Valnghinga) te khan ram vahnaah te khan min lo hruai nasa thei ngawt mai. A thang kam en dawn se, min rawn sawm a. Khuai lak tur hria se, min rawn sawm a. Lui te paihkang tur hria se, min rawn sawm a.

Remchang hmasa berah Leitlangpui zin a ngai a ni :)